Vísitalan lækkaði um 3 prósent

Úrvalsvísitalan í Kauphöllinni lækkaði um tæp þrjú prósent í gær, sem er með því mesta á einum degi og hefur hún ekki lækkað meira á einum degi síðan í maí árið 2001. Þessa mikla lækkun jafngildir því að markaðsvirði fyrirtækja í úrvalsvísitölunni hafi lækkað um tuttugu og níu milljarða króna á einum degi. Það lætur nærri að vera jafn mikið og þriðjungur af útflutningsverðmæti sjávarafurða í heilt ár. Aðeins tvö félög í úrvalsvísitölunni héldu verðgildi sínu í gær, HB Grandi og Medcare Flaga. Vísitalan hefur verið að lækka jafnt og þétt undanfarna daga og segja fjármálasérfræðingar að það megi meðal annars rekja til þess hve gengið var orðið hátt og hinsvegar til mikils framboðs á nýjum hlutabréfum. Mjög stórt útboð er nýafstaðið hjá KB banka og á næstunni munu ný bréf flæða inn á markaðinn, meðal annars vegna þess að Íslandsbanki, SÍF og Bakkavör áforma öll meiriháttar hlutafjárútboð. Þrátt fyrir umtalsverða lækkun í þessum mánuði er verðbréfavísitalan enn lagt yfir því sem hún hefur nokkru sinni komist áður, en sérfræðingar eru nokkuð á einu máli um það að hún muni eitthvað halda áfram að lækka á næstunni, en mismunandi mikið eftir spámanni.