Hætt eftir að Jón komst í málið

Skömmu eftir að Jón Steinar Gunnlaugsson komst á snoðir um gerð sjónvarpsþáttar um prófessorsmálið svokallaða var hætt við gerð þáttarins. Dagskrárstjóri sjónvarps segir Jón Steinar ekki hafa komið nálægt þeirri ákvörðun. Guðrún Lilja Hólmfríðardóttir tjáði sig um málið í morgunblaðinu á fimmtudag. Faðir hennar var sýknaður af ákæru um kynferðisbrot gegn henni í hæstarétti. Hún greindi frá því að tekið var við hana viðtal til sýningar í þáttinn Sönn Íslensk sakamál en að eftir að Jón Steinar Gunnlaugsson, hæstaréttardómri, frétti af gerð þáttarins hafi verið hætt við gerð hans. Rúnar Gunnarsson, dagskrárstjóri ríkissjónvarpsins, segir í tilkynningu að Jón Steinar hafi ekki komið nálægt þeirri ákvörðun. Endurmat hafi leitt það í ljós að ákveðið var að hætta við gerð þáttarins. Reyndar segir Guðrún Lilja ekki að Jón Steinar hafi stöðvað þáttinn. Hún bendir á að um leið og hann hafi komist á snoðir um hann hafi þátturinn verið stöðvaður. Þeir sem þekkja til heimildaþáttagerðar vita að afar sjaldan ef einhvern tíma eru tekin viðtöl með öllum þeim tilkostnaði sem af því hlýst ef ekki liggur fyrir ákvörðun um að sýna efnið. Þá er jafnframt afar sjaldgæft að greitt sé fyrir efni sem ekki er sýnt en það var gert í þessu tilfelli. Samkvæmt upplýsingum fréttastofu lá sú ákvörðun fyrir hjá ríkissjónvarpinu að sýna þáttinn þegar stofnunin skipti um skoðun. Þá hefur fréttastofu líka vitneskju um það að ýmislegt nýtt kom fram í viðtalinu sem ekki hafði heyrst áður. Þrjár greinar voru ritaðar til varna Jóni Steinari í morgunblaðið í gær en hann varð hæstaréttardómari á föstudag.