Geðsjúkum fanga vísað á brott

Geðsjúkum kvenfanga var vísað frá geðdeild Landspítala eftir klukkustundardvöl þar, þrátt fyrir tvær alvarlegar sjálfsvígstilraunir. Landlæknir rannsakar málið. Sex til átta fangar í íslenskum fangelsum eru í raun ófærir um að afplána refsingu sína þar inni. Í bréfi sem fangelsismálastjóri skrifaði heilbrigðisráðherra í sumar kemur fram að þessir sex til átta fangar eigi við svo alvarlega geðsjúkdóma að stríða að þeir séu ófærir um, tímabundið eða til langframa, að afplána refsingu sína í fangelsum. Í skýrslu alþjóðlegrar eftirlitsnefndar evróopuráðsins um pyntingar á föngum og á geðsjúkrahúsum árið 1998 kom fram að íslenskir fangar ættu erfitt með að fá flutning á geðsjúkrahús þegar þeir væru veikir á geði. Það væri vegna tregðu stjórnenda geðsjúkrahúsa til að taka við föngum og vista á almennum geðdeildum. Samkvæmt heimildum fréttastofu var eftirlitsnefndin aftur hér á ferðinni í sumar og hafði þá svipaðar athugasemdir. Nýja skýrslan er hinsvegar ekki tilbúin. Fangelsismálastjóri staðfestir í raun í bréfinu að þetta ástand sé enn við lýði og segir að komið hafi fyrir að þegar geðlæknar hafi sent eða vistað fanga á geðdeild, hafi þeim annað hvort verið snúið við á tröppunum eftir nokkurar klukkustundir eða þeir sendir aftur í fangelsið. Það sé hinsvegar óviðunandi, ekki einvörðungu gagnvart sjúklingunum heldur einnig gagnvart starfsmönnum fangelsanna og öðrum föngum. Þess er farið á leit í bréfinu að tryggt sé að til sé viðeigandi stofnun fyrir þessa einstaklinga. Landlæknir hefur kallað eftir skýringum frá Landspítalanum vegna kvenfanga sem var sendur aftur í kvennafangelsið í Kópavogi í vor þrátt fyrir tvær alvarlegar sjálfsvígstilraunir. Fangelsismálastofnun kvartaði við Landlækni vegna málsins en eins og kemur fram í bréfi Fangelsismálastjóra til ráðherra er það ekki hið fyrsta sinnar tegundar.