Tóbaksuppljóstrarinn á Íslandi

Maðurinn sem vann sér frægð fyrir að ljóstra upp um tóbaksframleiðendur er staddur hér á landi til að halda fyrirlestur um skaðsemi reykinga.  Dr. Jeffrey Wigand heldur fyrirlestur á Nordica hóteli klukkan hálffjögur á morgun en þar mun hann meðal annars fjalla um tóbaksvarnir og ásókn tóbaksiðnaðarins í unga fólkið. Hann varð heimsfrægur eftir að hann kom fram í bandaríska þættinum 60 mínútum þar sem hann ljóstraði upp leyndarmálum tóbaksrisanna og greindi frá því sem raunverulega gerðist á bak við tjöldin. Kvikmyndin The Insider frá árinu 1999 byggir á sögu Wigands, og fer stórstjarnan Russel Crowe með hlutverk hans. Eftir 25 ár í tóbaksiðnaðinum fékk Wigand nóg og taldi það skyldu sína að stíga fram í sviðsljósið. Hann segir það jafnframt skyldu stjórnvalda að grípa í taumana og vernda þá sem sé stjórnað eða eru blekktir á barnsaldri. „Tóbaksiðnaðurinn telur að ef þau ánetjist ung eru þau föst fyrir lífstíð. Það er tilgangurinn,“ segir Wigand. Wigand segir markaðssetningu tóbaksrisanna vægast sagt ömurlega. Hann segir framleiðendurna vita, a.m.k. í Bandaríkjunum og í þróuðu löndunum, að þeir þurfi að ná í eina milljón barna á ári til að viðhalda arðsemi greinarinnar „Markaðsetningin sem beinist að ungri stúlku hljómar: „Fáðu þér sígarettu frekar en sælgæti.“ Skilaboðin eru að ef þú reykir verðurðu grönn,“ segir Wigand. Sjá ítarlegra viðtal við dr. Jeffrey Wigand á Veftíví-síðunni.