Á uppboð þrátt fyrir samkomulag

Umboðsmaður Alþingis hefur komist að þeirri niðurstöðu að tollstjórinn í Reykjavík hafi gert mistök þegar hann auglýsti uppboð á eign vegna vangoldinna fasteignagjalda. Umboðsmaður telur ljóst að eigandi eignarinnar hafi gert samkomulag við tollstjórann um að hann frestaði uppboði gegn því að eigandinn greiddi tíu þúsund krónur inn á fasteignagjöld sín. Eignin var samt sem áður auglýst og kvartaði eigandinn til umboðsmanns. Umboðsmaður hafði samband við tollstjórann og kom þá í ljós að tollstjórinn hafði lofað að fresta uppboðinu. Auglýsingin hefði verið mistök og harmaði tollstjórinn þau. Eftir þessi svör tollstjórans í Reykjavík taldi umboðsmaður Alþingis ekki ástæðu til að halda áfram umfjöllun sinni um málið. Hann benti eiganda eignarinnar á að ef hann teldi sig hafa orðið fyrir skaða vegna birtingar auglýsingarinnar yrði það að vera hlutverk stjórnvalda og dómstóla að leysa úr því.