Vígahundar bannaðir í borginni

Atvik eins og það sem átti sér stað í Breiðholti síðasta föstudag þegar tveir stórir hundar, Rottweiler og Doberman, rifu kött í sig geta væntanlega ekki átt sér stað í framtíðinni ef hugmyndir sem nú eru uppi innan borgarkerfisins verða að veruleika "Það stefnir í að svona vígahundar, eins og ég vil kalla þá, verði bannaðir innan borgarmarkanna," segir Stefán Jón Hafstein, varaformaður borgarráðs. Kötturinn Pjakkur, sem hundarnir slitu í sundur, var ekki sá eini sem fékk að kenna á hundunum. Þeir veltu um barnavagni með barni í og ollu ótta meðal íbúa í Seljahverfi þar sem það liggur að Salahverfi í Kópavogi. Meðal þeirra hugmynda sem eru uppi er að tiltekið verði hvaða hunda megi ekki vera með innan borgarsvæðisins. Stefán Jón segir jafnframt áhuga fyrir því setja mun strangari reglur um hundahald sumra þeirra tegunda sem þykir ekki rétt að banna en talin er ástæða til að hafa eftirlit með.