Kristján formaður SGS

Kristján Gunnarsson, formaður Verkalýðs- og sjómannafélags Keflavíkur, var kjörinn formaður Starfsgreinasambands Íslands á ársfundi sambandsins í gær. Signý Jóhannesdóttir, formaður verkalýðsfélagsins Vöku á Siglufirði, bauð sig fram gegn honum, en meirihluti uppstillingarnefndar lagði til að Kristján yrði formaður. Kristján hlaut 489 atkvæði, eða rúm 64 prósent atkvæða en Signý 269 atkvæði, eða rúm 35 prósent. Þrjátíu verkalýðsfélög eru innan vébanda Starfsgreinasambandsins með um 40.000 félagsmenn. Björn Snæbjörnsson, formaður Iðju á Akureyri, var kjörinn varaformaður Sambandsins. Signý Jóhannesdóttir bauð sig einnig fram til varaformanns en hlaut rúm 32 prósent atkvæða gegn rúmum 67 prósentum Björns. Kristján segist ekki hafa verið feiminn við að takast á um formannsembættið og að hann væri sáttur við niðurstöðuna. Hann óttast ekki að Starfsgreinasambandið klofni í kjölfarið, en Kristján var í forystusveit Flóabandalagsins sem klauf sig frá félögum á landsbyggðinni í síðustu samningaviðræðum við Samtök atvinnulífsins. "Þvert á móti held ég að sambandið hafi verið að styrkjast. Menn gengu sameinaðir til samninga við ríkið. Auðvitað liggur styrkurinn hjá stóru félögunum og það verður að virða það en jafnframt verður að virða litlu félögin úti á landi." Kristján segist ætla að standa vörð um kaup og kjör félagsmanna sinna. "Verðlagsforsendum kjarasamninga er ógnað og tilverurétti verkalýðshreyfingarinnar hefur verið ógnað í Sólbaksdeilunni á Akureyri. Þetta eru næstu verkefni sem þarf að takast á við. Það verður að brjóta á bak aftur þau lögbrot sem hafa viðgengist fyrir norðan." Signý Jóhannesdóttir beið lægri hlut í kosningum til formanns og varaformanns. Hún segir að það sé gott fyrir sambandið af hafa kjörna forystu. Meðal annars þess vegna hafi hún boðið sig fram. Hún segist eiga nægan tíma til áframhaldandi starfa innan sambandsins. "Það eru enn 25 ár í það að ég nái þeim aldri sem Halldór Björnsson var á þegar hann var kjörinn formaður sambandsins og þó ég eigi þrjátíu ár að baki í störfum fyrir verkalýðshreyfinguna þá hef ég engar áhyggjur af því að mér fari að leiðast þar á næstunni." Hún telur að það hefði verið betri kostur fyrir hreyfinguna ef karl og konu hefði verið falið að stýra henni í sameiningu. ,,Ef við lítum í kringum okkur á ársfundinum þá sjáum við að kynjahlutfallið endurspeglar ekki hreyfinguna. Konur eru miklu færri en karlar."