Konunglegur uppruni dreginn í efa

Ný bók, Folket eða Fólkið, sem komin er út í Noregi, skekur nú norsku konungsfjölskylduna en í henni er konunglegur uppruni Ólafs Noregskonungs, föður Haraldar núverandi konungs, dreginn í efa.  Frá þessu er greint í norska blaðinu Dagbladet í dag. Það er í öðru bindi höfundarins Tors Bomanns Larsens um Folket, eða sögu norsku konungshjónanna Hákonar og Maud, sem þessar upplýsingar koma fram. Hákon og Maud voru foreldrar Ólafs Noregskonungs og afi og amma Haraldar, núverandi konungs. Í bókinni reynir höfundurinn að varpa ljósi á það hver hafi í raun verið líffræðilegur faðir Ólafs Noregskonungs og dregur í efa að það hafi verið Hákon, eins og hingað til hefur verið talið. Hann kynnir þar til sögunnar líflækni Maud drottningar, Englendinginn Sir Francis Laking, sem líklegan líffræðilegan föður hans en Laking meðhöndlaði drottninguna í sjúkrahússmeðferð í Lundúnum árið 1902 sem mikil leynd hvíldi yfir. Í bókinni er einnig að finna mynd af syni læknisins, sem hét Guy Francis Laking og var fæddur árið 1875, og er myndinni stillt upp á móti mynd af Ólafi þegar hann var krónprins á tímum síðari heimstyrjaldarinnar. Því er varpað fram í bók Larsens að læknissonurinn kunni jafnvel að hafa verið sæðisgjafi í þessu sambandi. Larsen hefur þessar upplýsingar eftir heimildamönnum innan evrópskra kóngafjölskyldna og úr gömlum þjóðskjölum. Hann dregur engar endanlegar ályktanir heldur varpar einungis þessum upplýsingum fram. Hans Fredrik Dahl sagnfræðingur segir í viðtali við Dagbladet að þetta sé mál sem hljóti að hreyfa við öllum Norðmönnum og telur að héðan í frá verði að líta á sambandið milli Hákonar og Ólafs í nýju ljósi. Haraldur Noregskonungur skrifar í bréfi til blaðsins að höfundar hafi frelsi til að túlka þessar upplýsingar á mismunandi vegu. Þegar þeim var varpað fram í maí síðastliðnum taldi norska konungsfjölskyldan að þær myndu ekki hafa afdrifaríkar afleiðingar, en í ágúst síðastliðnum ákvað hún samt sem áður að gera Kjell Magne Bondevik forsætisráðherra viðvart um þær.