Hafnargerð hófst í sumar

Næstu tvö ár vinnur hafnasjóður Fjarðarbyggðar við gerð álvershafnar við Hraun í Reyðarfirði. "Bryggjan verður 380 metra löng með 14,3 metra dýpi, en það er mesta dýpi sem þekkist við bryggju hér á landi," segir í tilkynningu bæjarfélagsins, en allt að 100 þúsund tonna skip eiga að geta lagst að bryggjunni. Inn- og útflutningur um bryggjuna er áætlaður um 1,2 milljónir tonna á ári. Verkið hófst í sumar þegar Arnarnarfell hóf að sprengja 40 þúsund rúmmetra af klöpp, dýpka og fylla um 260 þúsund rúmmetra og reka niður 450 metra langt stálþil. Tilboð verktaka í verkið hljóðaði að sögn bæjarins upp á 261 milljón króna. Fimmtungur verksins er sagður vera að baki.