Rússar segjast vera á flugæfingu

Fjögur af rússnesku herskipunum sem eftir voru á Þistilfjarðargrunni fóru ekki á brott í gær eins og til stóð. Aftur eru skipin orðin sjö. Gunnar Snorri Gunnarsson, ráðuneytisstjóri hjá utanríkisráðuneytinu, segir ráðuneytið ekki telja ástæðu til að gera of mikið úr veru herskipanna. "Þeir hafa verið tiltölulega nálægt landi vegna flugvélanna sem fylgja flugmóðurskipinu því þeir vilja hafa möguleika á að lenda á landi ef eitthvað bjátar á. Þeir voru búnir að tilkynna okkur það í lok september og báðu um leiðbeiningar um hvert vélarnar þeirra gætu leitað," segir Gunnar Snorri og bætir við að flugumferðarþátturinn vegna veru herskipanna sé það sem þeir hafi haft mestar áhyggjur af og leggi mesta áherslu á að sé í lagi. Hann segir rússneska flotann vera á æfingum og að þær hafi dregist. " Við höfum ekki talið að okkur stafi ógn af þeim en höfum lagt áherslu á að fylgst sé með þeim og öllu þeirra háttalagi," segir Gunnar Snorri. Aðspurður hverjir sjái um að fylgjast með skipunum svarar Gunnar Snorri að Landhelgisgæslan og aðrir bandamenn hafi augun á skipunum. Utanríkisráðuneytið hefur verið í sambandi við rússneska sendiráðið en Landhelgisgæslan við skipin sjálf. Gunnar Snorri segir að ekki hafi verið settar endanlegar dagsetningar á dvöl flotans og viðveru. Þeir séu fyrir utan landhelgi og séu ekki að aðhafast neitt við fiskveiðar eða rannsóknir og því í sjálfu sér ekkert ólöglegt við veru þeirra innan fiskveiðilögsögunnar. Skipin voru upphaflega sjö en á mánudag hélt flugmóðurskipið Kúsnetsov aðmíráll á brott frá landinu sem og tvo önnur skip úr flotanum. Um miðnætti á þriðjudag var flugmóðurskipið ásamt skipunum tveimur aftur komin í hópinn ásamt Pétri mikla, einu birgðaskipi og tveimur dráttarskipum. Í gærmorgun fékk Landhelgisgæslan upplýsingar frá skipunum um að þau ætluðu að vera í fjóra daga til viðbótar.