Íbúum landsins fækkar

Íbúum á höfuðborgarsvæðinu fækkaði lítillega á síðastliðnum þremur mánuðum og þónokkuð margir Íslendingar ætla að freista gæfunnar í útlöndum.  Fækkunin á höfuðborgarsvæðinu nam samanlagt um áttatíu og átta manns. Þá virðast þónokkrir sjá betri tækifæri í útlöndum en hér á landi því 365 Íslendingar fluttu úr landi umfram þá sem fluttu til landsins. Hins vegar eru aðfluttir erlendir ríkisborgarar rúmlega sjötíu fleiri en brottfluttir. Þetta þýðir í stuttu máli að Íslendingum á Íslandi fer heldur fækkandi en útlendingum á Íslandi fjölgandi. Af útlendingunum eru Portúgalar lang fjölmennastir, eða um 90. Fjölgun þeirra má rekja til Kárahnjúkavirkjunar. Hins vegar fækkaði innfæddum Austfirðingum á Austfjörðum um tólf og hefur þá fækkað um nokkra tugi frá áramótum, þrátt fyrir uppgang í atvinnulífi eystra. Fjölgun varð aðeins á Austurlandi, vegna aðfluttra útlendinga eins og áður sagði, og svo á Suðurlandi um fjórtán manns sem flestir eru Íslendingar. Víða er talsvert umrót, til dæmis í Vestmannaeyjum. Þaðan fluttu 132 á þremur mánuðum og 62 fluttu út í Eyjar. Þar hefur því fækkað um 68 manns á þremur mánuðum.