Óttast ekki fjárhaginn

Karl Sigurbjörnsson biskup segist ekki óttast um fjárhag kirkjunnar þótt ríki og kirkja yrðu skilin að eins og helmingur landsmanna vill. Kirkjan gerði þá kröfu til hundraða gamalla kirkjujarða. Hann segist hinsvegar óttast um siðinn í landinu og þau grunvallargildi sem tilvera þjóðarinnar byggist á. Um helmingur landsmanna vill aðskilnað ríkis og kirkju samkvæmt Gallup könnun á trúarlífi landsmanna. Karl Sigurbjörnsson segir að kirkjan hafi verið sjálfstæð meginhluta þúsund ára tilveru sinnar í landinu. Ríkið hafi tekið að sér að sjá um eignir kirkjunnar í upphafi tuttugustu aldar gegn því að hún nyti ákveðinnar fyrirgreiðslu ríkisvaldsins. Karl segist í sjálfu sér ekki hafa áhyggjur af fjárhag kirkjunnar ef bú hennar yrði gert upp. Hann hafi meiri áhyggjur af áhrifunum á samfélagsgerð okkar og siðina í landinu. Karl segir að kirkjan eigi mörg hundruð jarðir sem ríkið hafi annast síðan í upphafi tuttugustu aldar, hann segir að ríkisvaldið hafi hinsvegar á síðustu árum farið að tala eins og breyting hafi orðið á eignarhaldinu. Á kirkjujörðum eru heilu bæjarfélögin, svo sem Ísafjörður, Hafnarfjörður, Garðabær og Akranes. Komið hefur upp ágreiningur á síðustu árum sem rekja má til þessa, svo sem um Þingvelli og einstaka prestsetur. Karl segir að Kirkjan hafi látið þetta óátalið þar sem sambúðin við ríkið sé góð, en að sjálfsögðu yrðu gerðar kröfur til þessara jarða ef skilja ætti kirkjuna frá ríkinu. Biskup ítrekar það að það sé meiri ástæða til að óttast um þjóðfélagsgerðina en fjarhaginn ef sambúðinni yrði slitið, en gerð yrði krafa í eignir kirkjunnar ef aðskilnaður færi fram.