Ekki í höndum sveitarfélaga

Sveitarstjórnarmenn taka ekki afstöðu í kennaradeilunni og skýla sér á bak við Launanefnd Sveitarfélaganna, segir formaður Kennarafélags Reykjavíkur. Sigurður Geirdal, bæjarstjóri í Kópavogi bendir á að samningagerð sé ekki í höndum sveitarstjórnarmanna og segist bera fullt traust til samninganefndarinnar. Stjórnir Kennarafélaga á höfuðborgarsvæðinu sendu bréf til allra sveitastjórnarmanna í umdæminu og báðu þá um að svara spurningum, eins og þeirri hvort 230.000 króna grunnlaun eftir þriggja ára háskólanám árið 2007, væru sanngjörn. Fátt er um svör. Af fimmtán borgarfulltrúum er Formaður fræðusluráðs, Stefán Jón Hafstein, sá eini sem svarar. Þar tekur hann fram að kjörnir fulltrúar hafi valið að halda sig utan við áróðursstríð í kringum verkfallið og segist fylgjandi því að samningar um kaup og kjör takist við samningaborð. Flestir bæjarfulltrúanna annað hvort svara ekki eða taka sömu afstöðu og formaður fræðsluráðs, það er, benda á að launanefnd sveitarfélaganna fari með málið. Sigurður Geirdal, bæjarstjóri Kópavogs segir að auðvitað vinni launanefnd sveitarfélaganna samkvæmt ákveðnum línum, en línurnar í þjóðfélaginu séu ekki bara á höndum sveitarfélaga og kennara. Sigurður segir að sveitastjórnarfulltrúar hafi ekki farið í verkfall og það hafi aldrei staðið á þeim að ræða málin. Bæjarstjórinn er þó bjartsýnn á að orðið verði við kröfunum, enda hafi öll verkföll leystst á endanum.