Lögbann á aðgerðir Sjómannasamtaka

Lögbann var sett á aðgerðir sjómannasamtakanna vegna Sólbaks í dag. Formaður Sjómannafélags Eyjafjarðar segist hryggur yfir þessari niðurstöðu, en að baráttunni sé alls ekki lokið. Útgerðarmaður Sólbaks segir þetta staðfesta rétt útgerðarinnar í málinu og að Sólbakur landi á Akureyri á morgun. Sem kunnugt er töfðu forystumenn sjómanna löndun úr Sólbaki á dögunum, í kjölfar kjarasamnings útgerðarfélagsins Brims og áhafnar skipsins. Útgerðin fór fram á það við sýslumanninn á Akureyri að lögbann yrði sett á aðgerðir sjómannasamtakanna og varð hann við því. Konráð Alfreðsson, formaður sjómannafélags Eyjafjarðar segir hryggð í sínu hjarta, enda virðist útgerðarmenn fá allt sem þeir biðji um. Guðmundur Kristjánsson, útgerðarmaður, segir þetta staðfesta það sem hans menn hafi alltaf sagt, að það sem þeir séu að gera sé löglegt og þeir trúi á félagafrelsið sem þeir séu að berjast fyrir. Farið verði yfir það næstu daga hvað gert verði í framhaldinu. Konráð segir málinu engan vegin lokið, sjómenn muni setjast niður og ræða málin og síðan komi framhaldið í ljós. Sólbakur er væntanlegur til Akureyrar á morgun og vonast Guðmundur til þess að allt gangi að óskum þá.