Heimsfrægðin handan við hornið?

Gísli, íslenskur popptónlistarmaður sem býr í Ósló, er að gera það gott og það virðist sem heimsfrægðin sé rétt handan við hornið. Gísli er Kristjánsson og er 26 ára gamall. Foreldrar hans fluttu til Noregs fyrir áratug og hann ætlaði að heimsækja þau, en settist að í staðinn. Hann hefur gefið út smáskífu sem hlaut gríðarlega góða dóma í þekktum tónlistartímaritum eins og Q en á mánudaginn kemur fyrsta breiðskífa hans út og það hjá plöturisanum EMI. Hún heitir How about that og kemur út í 15 löndum í Evrópu, Ástralíu og Asíu þannig að óhætt er að segja að um stóran dag sé að ræða. Gísli segist hafa verið að klára þriðja tónleikaferðalag sitt um England á dögunum og nú sé stefnan sett á meginland Evrópu. Að því loknu túrar hann aftur um England. Það er óhætt að segja að velgengnin hafi komið Gísla á óvart enda átti platan upphaflega bara að koma út í Noregi og Englandi. Hann segir þetta mjög gaman en miklu meiri vinnu en hann hélt að þetta væri. Gísli segir sjálfan sig og atvik úr eigin lífi vera yrkisefni sitt. Þetta séu fyrst og fremst sannar sögur en með smá ýkjum. Sjálfur lýsir Gísli tónlist sinni sem eins konar hipp hoppi en honum hefur verið líkt við sveitir eins og Dinosour Jr., Beck og Beta Band en hann fylgir einmitt Beta Band á síðustu tónleikaferðinni sem sú sveit ætlar að fara. Gísli segist ekki vera búinn „að meika það“, eins og það er stundum kallað, en bara það að fá þetta tækifæri er í rauninni að meika það í hans huga.