Taka fingraför og ljósmynd

Fingraför allra Íslendinga sem koma til Bandaríkjanna verða framvegis skönnuð inn í gagnabanka og einnig verður tekin af þeim ljósmynd. Þetta verður gert vegna hryðjuverkavarna. Framvegis verða allir íslenskir ferðamenn stöðvaðir við vegabréfseftirlit í Bandaríkjunum, tekin af þeim andlitsmynd og fingraför af vísifingrum. Allt verður þetta vistað í gagnabanka sem nota á í baráttunni gegn hryðjuverkum. Þessi háttur hefur verið hafður á um íbúa annarra landa um hríð en enn sem komið er hefur enginn hryðjuverkamaður fundist heldur einungis nokkrir smákrimmar. Gagnagrunnurinn dugir enda einungis til að bera kennsla á þekkta hryðjuverkamenn. Mannréttindafrömuðir segja þetta klárt brot á persónuvernd og óskilvirka baráttuaðgerð en því hefur verið haldið fram að svo miklum upplýsingum sé safnað að engin leið sé að vinna úr þeim. Frá og með 26. október næstkomandi þurfa Íslendingar að auki að framvísa nýjustu tegund vegabréfa til að komast án áritunar inn í Bandaríkin. Einungis vegabréf með tölvurönd verða tekin gild. Ári síðar, í október 2005, verður svo hert enn á reglunum og krafist lífkenna, þ.e.a.s. einkum upplýsinga um höfuðlag. Íslensk vegabréf sem gefin eru út eftir 1999 duga sem stendur en dómsmálaráðherra hefur skipað starfshóp til að undirbúa ný vegabréf með lífkennum.