Flugfreyjurnar vinna of lítið

Uppsagnir íslenskra flugfreyja hjá Iceland Express eru siðlausar og grafa undan réttindum þeirra, segir formaður Flugfreyjufélagsins. Talsmaður Iceland Express segir flugfreyjurnar vinna of lítið. Flugfreyjufélagið dregur lögmæti uppsagnanna í efa og gagnrýnir harðlega að forsvarsmenn Iceland Express gefi sér það að samningar, sem verða lausir í lok næsta mánaðar, muni ekki nást. Flugfreyjunum verður boðið starf hjá Astreus, flugfélaginu sem flýgur fyrir Iceland Express, með sömu réttindi og kjör og áður. Ásdís Eva Hannesdóttir, formaður Flugfreyjufélags Íslands, segir að siðferðilega sé þetta rangt. „Maður gerir ekki svona. Í hvernig samfélagi búum við ef fyrirtæki, sem líkar ekki viðsemjandi eða hugsanlega nenni ekki að leggja það á sig að ganga til kjaraviðræðna, hendir þessu út úr landi?“ segir Ásdís. Ólafur Hauksson, upplýsingafulltrúi Iceland Express, segir samningana hafa verið róast í þá átt að flugfreyjurnar vinni stöðugt minna. Fyrirtækið vilji koma því örlítið upp og Ólafur segist ekki sjá siðleysið eð lögleysið í því. „Það er hins vegar mjög umhugsunarvert að við skulum ekki treysta okkur til að fara í kjarasamningaviðræðu við Flugfreyjufélagið vegna þess hve Flugleiðir eru sterkt og áhrifamikið afl þar innanhúss. Við myndum til dæmis fyrst og fremst vera í kjarasamningum við starfsmenn Flugleiða sem er mjög skrítin staða,“ segoir Ólafur. Á myndinni eru t.v. Jóhannes Georgsson, fyrrverandi framkvæmdastjóri Iceland Express, og Ólafur Hauksson, upplýsingafulltrúi fyrirtækisins.