Kárahnjúkar í netsamband

Vinnubúðir Impregilo við Kárahnjúkavirkjun hafa nú verið tengdar Internetinu auk þess sem símasamband við umheiminn hefur verið bætt í kjölfar samnings fyrirtækisins við Atlassíma um rekstur samskiptamiðstöðvar fyrir starfsmenn. "Alls hafa verið settar upp 10 miðstöðvar á vinnusvæðinu og geta starfsmenn fyrirtækisins nú hringt beint til síns heima úr símabásum miðstöðvanna. Að auki hafa verið settar upp tölvur með Internetaðgangi sem starfsmenn geta keypt aðgang að hálftíma eða klukkutíma í senn," segir Ómar Ægisson, framkvæmdastjóri hjá Atlassíma og bætir við að nú geti starfsmenn Impregilo loks á einfaldan og fljótlegan máta fengið fregnir frá heimaslóðum. Massimiliano Caminzuli einn yfirmanna Impregilo segir um mikla aðstöðubót að ræða fyrir starfsmenn og að samskiptamiðstöðvarnar hafi mælst vel fyrir, enda sé almennt ekki fastlínusamband í gistiskálum og tíð símtöl til útlanda gegnum farsímakerfið séu dýr.