Synir og tengdasynir hólpnir

Megn óánægja er meðal slökkviliðsmanna með hvernig staðið hefur verið að uppsögnum hjá Slökkviliðinu á Keflavíkurflugvelli. Heimildir blaðsins herma að átta yfirmenn hjá slökkviliðinu hafi lagt til nöfn þeirra sem segja ætti upp störfum. Að minnsta kosti fjórir þessara yfirmanna eiga annað hvort son eða tengdason innan slökkviliðsins sem ekki var í hópi þeirra sem sagt var upp. Síðustu tvo mánuði hafa 14 slökkviliðsmenn þegar fengið uppsagnarbréf og þremur til viðbótar var sagt upp núna um mánaðamótin. Með því hefur 17 slökkviliðsmönnum af hundrað sem á vellinum vinna verið sagt upp. Sigurður Arason, aðstoðarslökkviliðsstjóri Slökkviliðsins á Keflavíkurflugvelli, segist ekki mega tjá sig, hvorki um yfirstaðnar né fyrirhugaðar uppsagnir hjá slökkviliðinu. Hann neitar því þó alfarið að fjölskyldutengsl yfirmanna ráði því hverjir halda vinnunni hjá slökkviliðinu á vellinum. "Það kemur þessu ekkert við. Við fáum bara beiðnir um að fækka svo og svo mörgum í ákveðnu liði hér hjá okkur og tengist þessu ekkert. Hér er ekkert verið að tala um nein fjölskyldutengsl," segir Sigurður og neitar að tjá sig um hvaða þættir ráði því hvaða slökkviliðsmenn séu látnir fara. Sjálfur tengist Sigurður fjölskylduböndum slökkviliðsmanni sem ekki var látinn fara. "Það kemur þessu máli ekkert við. Sá einstaklingur er að fara frá liðinu," segir Sigurður. "Ákvörðun um uppsagnir einstakra starfsmanna flotaflugstöðvar varnarliðsins ræðst af mati yfirmanns hennar miðað við að lágmarksröskun verði á rekstri eftir breytingu," segir í yfirlýsingu sem Friðþór Eydal, upplýsingafulltrúi Varnarliðsins sendi frá sér eftir að hafa verið spurður til hvaða hluta væri horft þegar tekin væri ákvörðun um niðurskurð í starfsliðinu. Ekki fylgdi með svarinu hvort talið væri að mikil röskun á rekstrinum gæti orðið ef sonum eða tengdasonum yfirmanna slökkviliðsins yrði sagt upp störfum. Fram hefur komið að uppsagnir starfsmanna Slökkviliðsins á Keflavíkurflugvelli eru ekki í samræmi við starfsaldur þeirra og hefur Vernharð Guðnason, formaður Landssambands sjúkraflutninga- og slökkviliðsmanna lýst yfir áhyggjum af ástandinu á Keflavíkurflugvelli.