LÍÚ segir þróunina uggvænlega

Landsamband íslenskra útvegsmanna segir þróun á hráolíumarkaði hafa verið uggvænlega undanfarin tvö ár. Verð á hráolíu er nú komið í 50 dollara tunnan og af fréttum að dæma virðast meiri líkur en minni á að verð á hráolíu geti stigið enn frekar. Þetta kemur fram í tilkynningu frá LÍÚ. Því var haldið fram fyrir nokkrum vikum að svo gæti farið að tunnan af hráolíu gæti farið í 50 dollara. Það hafa nú reynst orð að sönnu. Þessi þróun á verði hráolíu hefur leitt til þess að verð fyrir unnar olíuafurðir hefur hækkað mikið og er verð á gasolíu á Rotterdam-markaði nú enn á ný í sögulegu hámarki, eða nálægt 423 dollurum á tonnið, segir í tilkynningunni. Efnahagsleg áhrif olíuverðshækkana segja fljótt til sín með hækkandi verðbólgu og minnkandi hagvexti. LÍÚ segir þessa hækkun þýða versnandi afkomu fyrir sjávarútveginn þar sem hærra hlutfall af tekjum fer til þess að greiða olíuna. Lauslega áætlað má gera ráð fyrir að hækkun á olíukostnaði fiskiskipa á ársgundvelli sé nálægt 2, 5 milljörðum króna hærri vegna olíuverðshækkana á þessu ári.