Munað getur kílói á hvern dilk

Sökum hita og þurrka hefur fé skilað sér rýrara af fjalli núna í haust en áður hefur verið. Að sögn Özurar Lárussonar, framkvæmdastjóra Landssamtaka sauðfjárbænda, er ástandið misslæmt eftir landsvæðum. "Verst er ástandið þar sem mestu þurrkarnir hafa verið, á Norðausturlandi og þar í kring. Þar sjá menn áberandi mun á fé þegar það kemur af fjalli," segir hann og telur einsýnt að áhrifin kunni að verða einhver á afkomu bænda á þessum svæðum. "Menn eru jafnvel að tala um að muni kannski einu kílói á meðalinnleggi á hvern dilk, þannig að það hefur töluvert að segja." Nákvæmar tölur um hversu miklu munar á fé milli ára segir Özur að ættu að liggja fyrir í lok sláturtíðar. Jóhann Jónsson, sauðfjárbóndi í Mjóanesi í Þingvallasveit, taldi ekki að mikilla áhrifa myndi gæta hjá sér þótt fé væri eitthvað rýrara af fjalli í ár en verið hefur. "Afurðirnar eru aðeins minni, en það er svo margt annað sem spilar inn í," sagði hann og nefndi hluti á borð við gæðastýringu í sauðfjárrækt og flokkun í sláturhúsum. Hann sagði nokkuð um að eldri sauðfjárbændur hættu rekstri vegna aukinna kvaða um gæðastýringu. "Ef menn standa sig ekki í að skila inn skýrslum þá eru beingreiðslur til þeirra skertar um ein 22 prósent." Özur segir ekki komna reynslu á það enn hvort sauðfjárbændur skiluðu almennt inn gæðaskýrslum, í ár væri fyrst að koma reynsla á nýtt kerfi. "Samkvæmt nýjum sauðfjársamningi sem samþykktur var af meirihluta bænda verða þeir af 22 prósentum beingreiðslna sem uppfylla ekki kröfur gæðastýringar." Hann segir um 1.550 sauðfjárbændur hafa skráð sig inn í gæðastýringu, en inni í þeim tölum væri bróðurparturinn af þeim bændum sem væru með hrein sauðfjárbú. "Síðan á bara eftir að koma í ljós hverjir standa sig og hverjir standa sig ekki," bætti hann við og sló á að um 200 hrein sauðfjárbú stæðu enn utan gæðastýringarinnar. "En það var svo sem heldur ekki við því að búast að allir kæmu inn í einu."