Metfjöldi tjaldgesta í Ásbyrgi

Metfjöldi heimsótti Jökulsárgljúfur í sumar að sögn Árna Bragasonar, forstöðumanns umhverfisverndarsviðs Náttúrufræðistofnunar. Hann segir að aldrei hafi fleiri sótt tjaldstæðin í Ásbyrgi og í Vesturdal heim, hvorki Íslendingar né útlendir ferðamenn. "Það sem einna ánægjulegast við þetta er að í hópnum í ár eru 14 þúsund Íslendingar." Hann segir einsýnt að veður ráði mestu um komur Íslendinga. "Enda er alltaf gott veður í Ásbyrgi," segir hann. Árni segir há svæðinu að vanti bændagistingu en hún sé sem betur fer að byggjast upp. "Síðan gerir deiliskipulag ráð fyrir lóð undir hótel í mynni Ásbyrgis í landi þjóðgarðsins. Þar vonumst við til að einhver vilji byggja hótel," segir hann og telur ekki skipta máli þótt tjaldstæðin missi þá kannski spón úr aski sínum. "Við erum í fræðslu og náttúruvernd og bara ánægjulegt ef aðrir geta byggt upp ferðamannaþjónustu og haft tekjur af. Meðal annars er jú tilgangurinn með starfi okkar að nýta svæðin á þann hátt að þau varðveitist til lengri tíma og helst að einhverjir geti haft af því tekjur."