Bjóða upp á skyr

Vefritið Vantrú.is ætlar að bjóða þingmönnum upp á skyr þegar þing verður sett á föstudaginn, til að minna á málstað trúleysingja. Forsvarsmenn heimasíðunnar segja aðalmálefni vefritsins nú vera tengsl ríkis og kirkju sem þurfi að rjúfa. Þessi tengsl sjáist einna best við þingsetninguna, sem að stórum hluta sé kirkjuleg athöfn. Athöfnin sé því móðgandi við þá Íslendinga sem ekki aðhyllast kenningar þjóðkirkjunnar. Raunverulegt trúfrelsi feli meðal annars í sér frelsi frá trúarbrögðum og með því að láta kirkjuleiðtoga fá lykilhlutverk við þingsetninguna sé í raun verið að hæðast að trúfrelsisákvæði stjórnarskrárinnar. Athöfnin sýni að trúfrelsi á Íslandi sé enn aðeins orðin tóm. Þá minnir Vantrú á mál Helga Hóseasonar og nauðsyn þess að verða við réttlátum kröfum hans. Í því sambandi verður heimildarmynd Jóns Karls Helgasonar um hann, Mótmælandi Íslands, sýnd að Garðarstræti 2 klukkan 18. Allir eru velkomnir og þá sérstaklega þingmenn.