Strandaglóparnir komnir heim

Vél Icelandair, sem varð innlyksa í Noregi í gær, lenti í Keflavík á tólfta tímanum. Önnur vél fór til Óslóar í morgun, en ekki er ljóst hvort hún tefst, þar sem enn er mikil óreiða á Gardemoenflugvelli.  Vélinni var snúið frá Ósló í gær til Björgvinjar vegna verkfalls flugumferðarstjóra í Ósló. Farþegar með vélinni þurftu síðan að finna sér aðrar leiðir og á eigin vegum þaðan og voru sumir ósáttir við skort á upplýsingum, en SAS sér um að afgreiða vélar Icelandair í Noregi. 150 manns biðu í gær eftir flugi frá Ósló til Keflavíkur. Innan við helmingur, um 60 manns, kom með vélinni til Keflavíkur nú á tólfta tímanum, en þeir sem eftir eru hafa bókað sér far með vélinni í dag og á morgun. Önnur vél Icelandair er nýlent í Ósló, en ekki er ljóst hvort að áætlun hennar raskast, þar sem mikið óreiðuástand er enn á flugvellinum þar og reyndar er óttast að það ástand eigi eftir að breiðast út. Í norskum blöðum í dag er haft eftir upplýsingafulltrúa SAS Braathens í Noregi að fólk eigi ekki að mæta á Gardermoen flugvöll við Ósló nema athuga fyrst hvort öruggt sé að hægt verði að fljúga.