Ekki vitað um eldsupptökin

Enn er allt á huldu um eldsuptök í stórhýsinu sem eyðilagðist í eldsvoða á Blönduósi í nótt. Það sem enn stendur uppi af rústunum, verður rifið niður. Tugmilljóna tjón varð í brunanum þegar húsið, sem er stærsta húsið á staðnum brann að stórum hluta. Slökkviliðinu á Blönduósi, frá Skagaströnd og Hvammstanga, sem kölluð voru til aðstoðar tókst um klukkan sjö að ráða niðurlögum eldsins, en áfram er verið að slökkva í glæðum og nú rétt undir hádegi rauk enn víða. Húsið er fjögur þúsund fermetra iðnaðarhúsi við Efstubraut á Blönduósi, rétt við þjóðveginn norður og gjarnan nefnt Votmúli. Eldsins varð vart rétt uppúr klukkan fjögur í nótt og breiddist hann skjótt um meirihluta hússins, meðal annars í timburlager Húnakaups og bílaverkstæði, og víða sprungu gaskútar þannig að slökkviliðsmönnum stóð hætta af, en engan sakaði. Slökkviliðsmönnum tókst með harðfylgi að koma í veg fyrir að eldur teygði sig framhjá eldvarnarvegg í norðurenda hússins, en handan hans og í nýrri viðbyggingu er nýja ullarþvottastöðin, sem tókst að verja. Svo vel vildi til að hæglætis veður var á svæðinu þannig að neistaflug ógnaði ekki byggðinni og slökkviliðsmenn höfðu nægilegt vatn. Um tíma var óttast að sprenging yrði á gaskútalager í húsinu, en slökkviliðsmönnum tókst að kæla kútana í tæka tíð. Hluti þaks hússins er hruninn og sömuleiðis útveggir. Eldsupptök eru ókunn, en eldurinn virðist hafa kviknað í suðurenda hússins, þar sem fyrirtækið Vilko hefur meðal annars starfssemi sína. Jóna Fanney Friðriksdóttir bæjarstjóri segir aðkomuna ljóta, en það sé mikill mildi að þarna hafi verið stór og mikill eldveggur, sem hafi varnað því að eldurinn teygði sig í frekari starfsemi í húsinu. Hún segist hafa áhyggjur af þeim 15-20 mönnum sem hafi unnið í húsinu, enda sé það stórt hlutfall í 1000 manna bæjarfélagi. Þetta sé bara nýskeð, en bæjarstjórnin muni setjast niður og ræða við þá sem hlut eiga að máli og sjá hvort hægt verði að koma til móts við þá.