Leikskólastarf líka í uppnámi?

Verkfall grunnskólakennara gæti haft áhrif á starfsemi leikskóla, þar sem leikskólakennarar geti ekki mætt til vinnu vegna eigin barna. Leikskólabörn verði því hugsanlega send heim. Áhrifa verkfalls grunnskólakennara gætir á flestum heimilum landsins, en þau áhrif gætu orðið enn víðtækari og teygt sig inn á heimili leikskólabarna. Leikskólastjóri að minnsta kosti eins leikskóla, Fálkaborgar, hefur sent foreldrum forráðamönnum barna á skólanum bréf, þar sem bent er á að náist ekki að uppfylla 6. og 7. greinar reglugerðar um leikskóla, þar sem kveðið er á um fjölda barnagilda fyrir hvert stöðugildi leikskólakenna, sé Leikskólum Reykjavíkur heimilt að skerða dvalartíma barns. Leikskólastjórinn bendir á að á sínum leikskóla eigi sjö kennarar börn í grunnskóla og því gæti svo farið að þeir kennarar komist ekki alltaf til vinnu, dragist verkfall leikskólakennara á langinn. Í bréfinu segir að í Fálkaborg verði gerð áætlun ef til þess kemur að senda þurfi leikskólabörn heim vegna kennaraskorts og miðist áætlunin við að börn sem eru umfram þann fjölda sem hægt verður að bera ábyrgð á, verði send heim. Foreldrum verða veittar frekari upplýsingar um hvaða daga þeir megi búast við að barn þeirra komist ekki í leikskólann.