Áhyggjur af hnignun atvinnulífs

Verkalýðsfélagið Vaka á Siglufirði lýsir þungum áhyggjum af hnignun atvinnulífs á Siglufirði í ályktun félagsfundar Vöku sem haldinn var í gær. Þar segir að störfum fækki með hverju árinu sem líði og atvinnulífið verði fábreyttara. Félagið telur að oft hafi verið þörf á því að bæjarbúar taki höndum saman en nú sé það orðin brýn nauðsyn að allir þeir, sem vettlingi geta valdið, sameinist um að snúa vörn í sókn. Vaka fagnar því þeim hugmyndum sem fram koma í fundargerð bæjarráðs Siglufjarðar frá 8. september um ráðstefnu um atvinnumál og fund með forsætisráðherra og hvetur til að til þessa verði efnt hið fyrsta. Vaka telur það mjög alvarlegt þegar fyrirtæki og stofnanir nýta sér bágt atvinnuástand og gera tilraunir til að færa kjör starfsmanna sinna niður að, eða niður fyrir, lágmarkskjör. Það sé fádæma ósvífni af stórfyrirtækjum sem á hátíðarstundum hæla sér af hagræðingu og snilld í rekstri, misnota aðstöðu sína og knýja starfsmenn til að gera ólöglega kjarasamninga. Verkalýðsfélagið kveðst í ályktuninni fordæma alla slíka tilburði. Vaka lýsir sig einnig andvígt því að störfum almenns verkafólks sé breytt í verktakastörf. „Sérstaklega er þetta ógeðfellt þegar ríki og sveitarfélög beita þessari aðferð,“ segir orðrétt í ályktuninni. Að lokum skorar Vaka á bæjaryfirvöld, forsvarsmenn siglfirsks atvinnulífs og þá fulltrúa ríkisstjórnar Íslands sem láta sig atvinnu-, félags- og byggðamál varða, að mynda samráðshóp um framtíð byggðar á Siglufirði.