Verkfall tímaskekkja?

Menn eru almennt sammála um að svo mikið beri á milli deiluaðila að verkfallið verði að líkindum langvinnt. Eftir að launanefnd sveitarfélaga hafnaði tilboði kennara um samning til tíu mánaða á sunnudag er ólíklegt að menn nái saman um skammtímasamning. Fulltrúar Samfoks og Heimilis og Skóla hittu menntamálaráðherra í morgun og ræddu verkfallið og mögulega aðkomu ríkisvaldsins. Ráðherra sagði við það tilefni hendur sínar bundnar í málinu. Bergþóra Valsdóttir, framkvæmdastjóri Samfoks, segir samningsaðila hafa haft 6 mánuði til samninga, en samt sé himinn og haf á milli. Hún telur ekki eðlilegt að fólk sætti sig við að menntun barnanna sé lítilsvirt á þennan hátt, enda séu börnin saklaus þriðji aðili og því sé þess krafist að málið verði leyst. Framkvæmdastjóri Samfoks segir ennfremur að kennraraverkföll séu tímaskekkja. Hún segist íhuga sem foreldri afhverju það þyki sjálfsagt að setja lög á sjómenn til að bjarga verðmætum úr sjó en það sé aldrei talað um lagasetningu í kennaraverkföllum. Hún segir ótrúlegt að ekki sé litið á börn okkar og menntun þeirra sem verðmæti. Og hún segist almennt undrast hversu lítil viðbrögð komi frá foreldrum allra þeirra barna sem verkfallið bitnar á.Foreldrar geti enda varið hagsmuni barna sinna án þess að setja sig upp á móti kjarabaráttu kennara. Elín Thorarensen, fulltrúi Heimilis og skóla segir alveg skýrt að menntamálaráðherra beri að sjá til þess að sveitarfélögin ræki þá skyldu sína að halda úti skólastarfi. Það sé ekki mál skattgreiðenda hvernig framkvæmdinni sé háttað. Hún segir endanlega ábyrgð hjá ríkinu og það sé ríkisins að gera Sveitarfélögunum kleyft að standa við sínar skuldbindingar. Hún segir kennara eiga að hafa góð laun og ekki megi ýta undir atgervisflótta þeirra úr skólunum. Hins vegar séu kennaraverkföll tímaskekkja og kennarasambandið ætti að íhuga það að fara í framtíðinni inn í kjaranefnd og afsala sér rétti til verkfalla, sem sé tímaskekkja í nútímasamfélagi.