Skemmdir á Ólafsfirði

Skemmdir urðu á að minnstakosti tuttugu íbúðarhúsum í flóðunum í Óalfsfirði í gær, en tjónið hefur ekki verið metið, að sögn Stefaníu Traustadóttur bæjarstjóra. Hún segir að það hafi annars vegar flætt inn í kjallara og síðan hafi einnig nokkur þök ekki staðið af sér rigninguna og jarðvegsvatn sprautast í gegnum gólf og inn í húsin. Hún segist hafa verið hrædd um hitaveituna og mannvirki sem henni fylgja, fyrst og fremst mannvirki í fjallinu vestan við Ólafsfjörð, þar sem skriða hafi fallið yfir hluta þeirra mannvirkja. Hins vegar hafi tekist að koma í veg fyrir það og nú sé engin skriðuhætta til staðar, því að eftir miklar skriður árið 1988 hafi verið grafnir skurðir, sem hafi staðið sig 100% og hafi örugglega verndað bæinn mikið. Mat almannavarna í gær hafi verið að óhætt væri að senda út fréttatilkynningu, þar sem sagði að ekki væri hætta á aurskriðum. Í morgun var búið að ryðja slóð i gegnum skriðurnar í Ólafsfjarðarmúla þannig að vegurinn á milli Dalvíkur og Ólafsfjarðar var orðinn fær. Umferð var þá leyfð í samráði við lögregluna á Ólafsfirði og Dalvík og voru vegfarendur beðnir að sýna aðgæslu. Klukkan hálf ellefu var honum hins vegar lokað aftur vegna ræsagerðar og verður hann líklega lokaður fram á kvöld. Þótt vegurinn teljist fær, er mikið verk óunnið áður en hans kemst í samt lag eftir hamfarirnar.