Tveggja marka tap gegn Hammarby

Skagamenn biðu lægri hlut gegn sænska liðinu Hammarby, 0-2, í Evrópukeppni félagsliða í Svíþjóð í gærkvöldi. Það var Björn Runström sem kom heimamönnum yfir strax á áttundu mínútu en seinna markið leit ekki dagsins ljós fyrr en fjórum mínútum fyrir leikslok, það gerði Alexander Östlund. Í samtali við Fréttablaðið sagðist Ólafur Þórðarson, þjálfari Skagamanna, vera nokkuð sáttur við leik sinna manna: "Það var vitað að það yrði á brattann að sækja fyrir okkur í þessum leik og sú varð raunin. Þeir lágu nokkuð á okkur í leiknum, sóttu frá fyrstu mínútu, en samt sem áður náðum við að halda okkur nokkuð þokkalega uppi á vellinum töluverðan hluta leiksins. Við vorum í raun að spila vel miðað við aðstæður og það var því svolítil synd að fá þetta annað mark á okkur alveg í blálokin. Reyndar vorum við orðnir nokkuð þreyttir, einbeitningin klikkaði aðeins og það er bara eins og gengur og gerist í svona leikjum - þeir eru með talsvert öflugt lið og það var erfitt að standa undir þessari pressu. Róðurinn verður án efa erfiður í seinni leiknum, en ef við náum algjörum toppleik getum við alveg strítt þeim - á góðum degi er allt hægt," sagði Ólafur þórðarson.