Hættan liðin hjá í bili

Varnargarður sá er óttast var að brysti í miklum vatnavöxtum í Jökulsá á Dal í fyrrakvöld hélt og telja forsvarsmenn Impregilo og Landsvirkjunar að ekki sé lengur mikil hætta fyrir hendi. Her manna hefur síðustu sólarhringa unnið að því að styrkja garðinn en hann skilur milli árinnar og vinnusvæðisins við sjálfa Kárahnjúkastíflu. Lekið hefur undir varnargarðinn um langt skeið en slíkt er eðlilegt og sáu dælur um að dæla frá jafnóðum. Í fyrrakvöld varð álagið svo mikið að allar tiltækar hendur voru settar í að styrkja garðinn. Óttast var að svipað yrði upp á teningnum í gærkvöld en þar sem alskýjað var á Austurlandi urðu vatnavextir Jökulsár minni en kvöldið áður. Hjá Impregilo er þó allur vari hafður á þar sem veðurspár gera ráð fyrir betra veðri næstu daga og verður unnið á sólarhringsvöktum að breikkun varnargarðsins. "Vissulega fór um marga hér þegar hækkaði jafn ört í ánni og raunin varð," segir Leó Sigurðsson öryggisstjóri ítalska verktakafyrirtækisins Impregilo sem sér um framkvæmdir við Kárahnjúka. "Um leið og ljóst varð að hætta var fyrir hendi var strax gripið til aðgerða og þær hafa skilað sér. Garðurinn er nú mun sterkari og breiðari en hann var áður og hættan að mestu leyti liðin hjá." Brúin yfir Jökulsá við Kárahnjúka sem tvívegis hefur farið undir vatn síðustu daga heldur enn. Hún hefur skemmst en tekist hefur að forða því að brúargólfið fljóti burt. Í gærkvöld náði vatnsborð Jökulsár aðeins upp undir hana en setti ekki í kaf eins og undanfarin kvöld. Unnið er að því að færa rafmagnskapal þann er við hana var festur á staura yfir ána ef ske kynni að brúin færi. Líkurnar á því telja menn hverfandi nema að straumþungi Jökulsár grafi frá undirstöðum hennar. Slíkt hefur ekki átt sér stað hingað til.