Brennuvargur kveikti í bílum

Kveikt var í þremur bílum vestur á Melum í Reykjavík í nótt og tilraun gerð til að kveikja í þeim fjórða. Kveikt var í fyrsta bílnum um klukkan tvö og hinum tveimur með klukkustundar millibili. Slökkviliðið var kallað á vettvang í öllum tilvikum og skemmdust bílarnir mikið. Þeir voru allir ólæstir og virðist brennuvargurinn hafa hellt eldfimum vökva inn í þá og kveikt í. Grunur leikur á að hann hafi ætlað að kveikja í fjórða bílnum en þá hafi komið styggð að honum. Þetta voru allt fólksbílar í einkaeign og stóðu fyrir utan íbúðarhús. Mikið tjón hlaust af íkveikjunum en slökkviliðsmenn gátu í öllum tilvikum varið nálæga bíla. Brennuvargurinn er ófundinn en lögreglan telur nær fullvíst að sami maður hafi verið að verki í öllum tilvikum og hann hafi að öllum líkindum verið einn á ferð. Engin tengsl virðast vera á milli þessarra atvika nema að sami maðurinn hafi alls staðar verið á ferð. Lögregla segir þetta áminningu til fólks um að skilja bíla sína ekki eftir ólæsta.