Ragnar úrskurðaður í gæsluvarðhald

Tælensk yfirvöld framseldu um helgina Ragnar Sigurjónsson, fyrrverandi skreiðarútflytjanda, sem hvarf sporlaust fyrir fimm árum, og hefur hann verið úrskurðaður í gæsluvarðhald hér á landi. Ragnar, sem nú er 62 ára var á sínum tíma sölustjóri í Sjávarafurðadeild Sambandsins og sá þar meðal annars um útflutning á þurrkuðum þorskhausum til Nígeríu. Síðan stofnaði hann eigið fyrirtæki, Eyfell, og hélt þeirra starfsemi áfram. Í þeim viðskiptum kom upp eitthvað misjafnt og hófust réttarhöld yfir Ragnari í mars árið 1999. Hann mætti tvisvar fyrir dóm, en nokkru áður en hann átti að mæta í þriðja skiptið, eða annan apríl, fór hann til London og hvarf svo þaðan sporlaust og hafði ekkert samband. Vegna málsins var hann eftirlýstur af Interpol. Fréttastofunni er kunnugt um Íslendinga, sem lengi hafa vitað að hann var í Tælandi en einhverra hluta vegna gekk aldrei upp að fá hann framseldan fyrr, en nýverið var hann settur í fangelsi þar fyrir smáþjófnað. Úr þeirri vist var honum svo vísað úr landi með óformlegum hætti og kom hann hingað til lands á sunnudag í fylgd íslenskra lögreguþjóna frá Ríkislögreglustjóra. Í Héraðsdómi Reykjaness var hann svo í gær úrskurðaður í gæsluvarðhald til 23. þessa mánaðar og hefur hann þegar áfrýjað þeim úrskurði til Hæstaréttar.