Kostnaður við leit mikill

Kostnaður við leit að hópi ferðamanna sem sendu neyðarkall af hálendinu í vikunni nemur mörgum milljónum. Enn hefur ekkert spurst til hópsins. Enginn sem tengist málinu hefur gefið sig fram, svo enn er verið að grennslast fyrir um fólkið, en talsmaður þeirra sagði í neyðarkalli síðastliðinn fimmtudag að tuttugu manns væru veikir af matareitrun. Engin skipuleg leit hefur verið um helgina, en björgunarsveitir eru viðbragðsstöðu og fylgst er með þeim sem koma til byggða af hálendinu. Þá er stöðugt samband við skálaverði og leiðsögumenn sem eru á ferð um óbyggðir. Þyrla landhelgisgæslunnar og nær allur floti björgunarsveita hefur tekið þátt í leitinni, sem hefur verið mjög umfangsmikil. Kostnaðurinn hefur ekki verið tekinn saman ennþá, en það er því ljóst að hann hleypur á mörgum milljónum króna. Á morgun mun Ríkislögreglustjóraembættið funda ásamt þeim sem tekið hafa þátt í leitinni, til að ákveða hvað gert verður í framhaldinu.