Sláturúrgangur í gróðurmold

Sláturúrgangur úr stórgripum er tættur niður og verður að eðalgróðurmold norður á Akureyri. Fleiri þúsund tonn af slíkum úrgangi falla til á ári hverju en mest af því er grafið í jörð. Stærstur hluti þess úrgangs sem fellur til í sláturhúsum er einfaldlega urðaður. Endurvinnslufyrirtækið Tæting á Akureyri hóf hinsvegar tilraunir í fyrra við að búa til mold úr þessum úrgangi. Hann er þá tættur niður og er blandað við trjákurl, hrossaskít, fiskúrgang og leifum af byggi og höfrum sem notað var til ölgerðar. Tilraunirnar tókust það vel að nú er hafin framleiðsla. Ný aðstaða var tekin í notkun í vikunni. Jörundur H. Þorgeirsson hjá Tætingur ehf. segir það taka eitt ár þangað til hægt sé að blanda úrgangnum saman við aðra mold til að gera hana orku- og næringaríka. Eftir þrjú ár sé hægt að gróðursetja beint í moldina. Jörundur segir ekki hættu á að dýrasjúkdómar berist í moldina, því í vinnsluferlinu myndist mikill hiti sem drepur hugsanlega sýkingu. Það eina sem er vafamál er riðuveiki, og því er ekki tekið við sláturúrgangi úr sauðfé. Það er ekki lítið af sláturúrgangi sem fellur til árlega. Bara frá Norðlenska koma 1800 tonn á ári af stórgripaúrgangi. Með öllum öðrum úrgangi má ætla að lífrænn úrgangur sé um 5000 tonn á ári.