Lang flestir á Akureyri

Tjaldstæði á Akureyri yfirfylltust í nótt þegar íbúafjöldi bæjarins tvöfaldaðist. Talið er að þangað séu komnir yfir fimmtán þúsund gestir. Allt tiltækt lið lögreglu er á vakt ásamt liðsauka að sunnan. Hátíðin ein með öllu, á Akureyri, er lang fjölmennasta hátíð sem haldin er á landinu, um verslunarmannahelgina. Tjaldstæði í bænum sprungu þegar fólk hélt áfram að streyma þangað í nótt, og varð að vísa gestum á tjaldstæði fyrir utan bæinn. Í morgun var ákveðið að bæta við nýju tjaldstæði við félagsheimili Þórs, og þar er nú risin mikil tjaldborg. Það er bongóblíða á Akureyri, og það setur svip sinn á hátíðahöldin. Daníel Guðjónsson, yfirlögregluþjónn, sagði í samtali við fréttastofuna að miðað við mannfjölda hafi þetta allt gengið ótrúlega vel. Ölvun sé ekki verulegt vandamál, og í dag setti mestan svip á bæinn hjónafólk sem rölti um með barnakerrur. Auðvitað eru þarna nokkrir sem taka hraustlega til sín af vökva. Nokkrir hafa verið teknir með fíkniefni, en það var til einkaneyslu og allt minniháttar mál, að sögn Daníels. Umferð hefur gengið vel fyrir sig. Hinsvegar fótbrotnaði maður þegar hann velti torfæruhjóli sínu á torfærubrautinni í Glerárdal. Það er eina slysið sem orðið hefur, á þessari vel heppnuðu hátíð.