Málinu haldið opnu fram yfir helgi

Leit er haldið áfram að tuttugu frönskum ferðamönnum vegna neyðarkalls sem barst síðastliðinn fimmtudag. Búið er að leita á gríðarstóru svæði, bæði úr lofti og á landi. Þó að líkurnar á því að franski hópurinn sé raunverulegur með hverri klukkustund sem líður getur lögreglan ekki annað en leitað af sér allan grun. Neyðarkallið sem barst síðastliðinn fimmtudag var mjög óljóst, og sá sem það sendi sagði ekki hvar hann væri staddur, heldur aðeins að hann væri íslenskur fararstjóri tuttugu frakka, sem væru sárþjáðir af matareitrun. Þar sem kallið barst um talstöð og stóð stutt var ekki hægt að rekja það, en leit skipulögð út frá endurvörpum sem kallið barst um. Mikið lið var kallað út til leitar. Þyrla landhelgisgæslunnar var send á loft, um 120 björgunarsveitarmenn leituðu á landi, sem og nær allt lögreglulið á suðvesturhorninu. Hvorki hefur fundist tangur né tetur af þessum hópi, en lögreglan telur ekki óhætt að hætta allri eftirgrenslan. Jónína Sigurðardóttir, aðstoðaryfirlögregluþjónn, segir að lögreglan hafi strax tekið þessu alvarlega þar sem tilkynningin hljóðaði sem neyðarkall. Eftir að lögreglan sendi frá sér fréttatilkynningu, í gær, um þetta mál, bárust henni þrettán vísbendingar, eða tilkynningar sem gætu varpað á það ljósi. Jónína segir þessar tilkynningar þó ekki breyta stöðunni. Hún segir að málinu verði haldið opnu framyfir helgi, og þá verði staðan skoðuð á nýjan leik.