Björgúlfur skattakóngur

Björgólfur Guðmundsson, formaður bankaráðs Landsbankans, er skatthæsti einstaklingur sögunnar. Samkvæmt upplýsingum frá Skattstjóranum í Reykjavík greiðir Björgólfur 295 milljónir króna í opinber gjöld. Hann greiðir því um 800 þúsund krónur í skatt á degi hverjum. Í umdæmi Skattstjórans í Reykjavík koma næstir á eftir Björgólfi, Bogi Óskar Pálsson, fyrrum forstjóri Toyota-umboðsins, með rúma 81 milljón og Jón Ásgeir Jóhannesson með tæpar 79 milljónir í gjöld. Skatthæsti einstaklingurinn á Reykjanesi er Árný Enoksdóttir, ekkja Guðmundar Þorsteinssonar, útgerðarmanns í Hópi í Grindavík, með rúmar 102 milljónir og greiðir hún því næsthæstu opinberu gjöldin á landinu. Fast á hæla hennar eru bræðurnir Einar Sveinsson með um 100 milljónir og Benedikt Sveinsson með tæpar 98 milljónir, báðir í Garðabæ. Hæstu gjöld á Austurlandi greiða bræðurnir Örn Þór og Ágúst Hilmar Þorbjörnssynir í Höfn í Hornafirði en greiða þeir um og yfir 30 milljónir hvor. Guðmundur A. Birgisson er skattkóngur Suðurlands með rúmar 16 milljónir en Gunnar A. Jóhannsson í Árbæ og Guðmundur Jónsson á Selfossi greiða báðir rúmar 15 milljónir. Skatthæstir á Norðurlandi eystra eru bræðurninr Birgir og Vilhelm Ágústssynir frá Akureyri með tæpar 15 milljónir hvor. Skattkóngur Vesturlands er Páll Valdimar Stefánsson frá Munaðarhóli í Snæfellsbæ. Hann greiðir rúmar 33 milljónir. Leifur Halldórsson frá Patreksfirði greiðir hæstu gjöld á Vestfjörðum, eða rúmar níu milljónir en annar Patreksfirðingur, Jón Björgvin G. Jónsson, fylgir fast á eftir með níu milljónir. Gísli Ólafsson, læknir á Blönduósi, er skatthæstur á Norðurlandi vestra með sjö og hálfa milljón. Ekki fengust upplýsingar frá Skattstjóranum í Vestmannaeyjum.