Flogið til Eyja

Þjár vélar flugu til Vestmannaeyjar um þrjú leytið í dag. Ekki hafði verið flogið til eyjarinnar frá miðvikudegi og biðu um 500 manns eftir flugi. Jón Karl Ólafsson, forstjóri Flugfélags Íslands, segir allt flug hafi gengið að óskum nema til Vestmannaeyja. "Við erum búnir að fljúga allt sem við þurfum til Akureyrar, Egilsstaða og Ísafjarðar." Alls voru átta vélar á áætlun gærdagsins til Eyja. Örtröðin var mikil á flugvellinum en þó ekkert á við það sem áður þekktist. Það er liðin tíð að fólk bíði klukkustundum saman á flugstöðinni, segir Rúnar Árnason, starfsmaður kaffiteríunnar á Reykjavíkurflugvelli síðustu 18 árin. "Núna situr fólk heima hjá sér og horfir á textavarpið. Svo þegar það sér að það er orðið fært þá kemur það. Því miður fyrir mig," segir Rúnar því álagið á kaffiteríunni sé með hefðbundnu sniði. "Menn eru að fá sér öl og baguette eða samloku eða einhvað í þeim dúr," segir Rúnar. Karlahópur Femínistafélags Íslands var með starfsstöð á Reykjavíkurflugvelli og hvöttu farþega til að sýna ábyrgð og segja nei við nauðgunum. Þeir seldu frisbídiska, boli og gáfu barmmerki með slagorði baráttunnar; nei. Sigvarður Huldarsson var einn þriggja frá hópnum á svæðinu og útbýtti barmmerkjunum. Hann var nýkominn frá Þorlákshöfn þar sem hann mynnti farþega Herjólfs á ábyrgð sína. "Fólk hefur tekið vel í þetta. Það eru þó margir sem segja að það sé kannski ekki veður til þess að nota frisbí mikið en við vonum að það skáni einhvað," segir Sigvarður.