Fyrsta hraðbraut Íslands

Tvíbreið Reykjanesbraut frá mörkum Hafnarfjarðar og nánast inn að Vogum á Vatnsleysuströnd var opnuð fyrir umferð í gær. Sturla Böðvarsson, samgönguráðherra, hleypti umferð á nýja vegarkaflann sem er 12,1 kílómetra langur. Steinþór Jónsson, formaður Áhugahóps um örugga Reykjanesbraut, segir brautina mikilvægasta þjóðveg landsins. "Þetta er þjóðvegur til alþjóðaflugvallar. Þetta er fyrsta brautin sem er opnuð tvöfölduð á Íslandi," segir Steinþór og nefnir að þetta sé því fyrsta hraðbrautin á landinu þó hún verði það vonandi ekki í þeim skilningi. Steinþór Jónsson segir að í svona framkvæmd muni um hvern mánuð. "Þetta hefur verið mesta slysagildra Íslandssögunnar. Þetta er 40 kílómetra kafli. Í fyrra voru dauðaslys þarna með 60 daga millibili þegar sex manns létust í sex slysum. Ef við tökum slysasöguna þá hefur slysatíðni verið með 300 daga millibili. En aukningin er orðin svo mikil því nú er meiri umferðarþungi og hraðakstur er algengari." Áætlaður kostnaður við tvöföldunina á þessum kafla er 1.127 milljónir kr. og er þar einnig innifalinn kostnaður við hönnun og umhverfismat alla leið út að Reykjanesbæ.