Aðstæður til leitar slæmar

Björgunarsveitir Slysavarnafélagsins Landsbjargar í Rangárvallasýslu eru komnar til leitar á sunnanverðu hálendinu, í nágrenni við Laugaveginn svo kallaðan, leiðina á milli Landmannalauga og Þórsmerkur. Þá er TF-SIF þyrla Landhelgisgæslunnar kominn á svæðið til leitar. Leiðinda veður er á þessum slóðum, rigning og rok, ásamt því að vatna vextir eru í ám vegna mikilla rigninga. Lögreglan á Hvolsvelli kallaði út allar björgunarsveitir í Rangárvallasýslu til að fara inn í Landmannalaugar og á aðra þekkta staði norðan jökla, til að leita að 20 manna hópi franskra ferðamanna sem sendu frá sér neyðarkall um hádegisbil. Fararstjórinn sagði að flestir eða allir ferðamennirnir væru orðnir fár veikir, sennilega úr matareitrun og var óskað eftir hjálp, en sambandið rofnaði áður en hann náði að gefa upp staðsetningu. Landhelgisgæslan er að kanna með flug yfir svæðið, en þar er nú hvasst og slæmt skyggni. Hópurinn kallaði í talstöð á rás sem Ferðafélag Íslands notar og heyrði einn af starfsmönnum félagsins hjálparbeiðnina. Þegar starfsmaðurinn kallaði til baka og bað um staðsetningu komu engin svör.