Sjúkum slakað aftan úr skútu

Áhöfn á stórri franskri seglskútu dó ekki ráðalaus þegar þyrla Landhelgisgæslunnar kom til að sækja slasaðan bátsverja í nótt, heldur lét hinn slasaða í gúmmíbát og slakaði svo bátnum langt aftur úr skútunni, svo engin hætta stafaði af möstrum skútunnar. Skútan, sem heitir Tara - 5, er tvímastra og eru bæði möstrin mjög há. 25 hnúta vindur var á svæðinu og vaxandi alda þannig að sláttur var á möstrunum og hefði verið lífshættulegt fyrir sigmann að síga niður í skútuna sjálfa, og því greip áhöfnin til þessa ráðs. Slysið varð upp úr miðnætti þegar maðurinn klemmdist og særðist svo illa á hendi að við lá að hann missti tvo fingur. Áhöfnin hafði samband við björgunarmiðstöð í Frakklandi og að höfðu samráði við lækni þar, var óskað efitr aðstoð Landhelgisgæslunnarr, þar sem skútan var þá um 120 sjómílur norður af Siglunesi og löng sigling í land. Gæslan sendi lækni með þyrlunni, sem lenti á Akureyri með hinn slasaða laust fyrir klukkan sex í morgun. Skútan var að koma frá Skoresbysundi á Grænlandi og ætlaði suður fyrir land, en var snúið til Akureyrar og er væntanleg þangað í kvöld.