Tuttugu Frakkar týndir á hálendinu

Flugbjörgunarsveitin á Hellu er í viðbragðstöðu eftir að hjálparbeiðni barst frá hópi Frakka, væntanlega um 20 manns. Hópurinn kallaði í talstöð á rás sem Ferðafélag Íslands notar og heyrði einn af starfsmönnum félagsins hjálparbeiðnina. Þegar starfsmaðurinn kallaði til baka og bað um staðsetningu komu engin svör. Að sögn þess sem kallaði, sem er Íslendingur sem er með hópnum, eru allir meira og minna veikir og þurfa aðstoð til að komast til byggða. Hinsvegar er engin staðsetning á hópnum til staðar og því ekki hægt að koma honum til aðstoðar. Lögreglan á Hvolsvelli vinnur að rannsókn málsins en björgunarsveitarmenn eru tilbúnir í húsnæði Flugbjörgunarsveitarinnar á Hellu og geta farið af stað án tafar þegar staðsetning finnst.