Ráðherra hissa á Reykjavíkurhöfn

"Þetta kemur mjög mikið á óvart," sagði Sturla Böðvarsson samgönguráðherra um þá ákvörðun forráðamanna Reykjavíkurhafnar að hækka vörugjöld á ákveðnum flokkum neysluvara frá og með 1. júlí síðastliðnum um 184%. Með breytingunni hækkar gjaldið sem höfnin tekur úr 346 krónum á tonnið í 983 krónur. Árni Þór Sigurðsson, formaður Hafnarsambands sveitarfélaga, sagði að í raun væri um leiðréttingu á umræddum gjaldflokki að ræða. Samkvæmt nýjum hafnarlögum sem tekið hefðu gildi 1. júlí 2003 hefði samgönguráðherra átt að setja ákveðna viðmiðunargjaldskrá sem hefði átt að gilda í 12 mánuði þaðan í frá. Eftir 1. júlí á þessu ári hefði gjaldskráin átt að vera frjáls. "Það sem hann gerði þegar hann gaf út þessa bráðabirgðagjaldskrá var að fella niður svokallaðan 4. flokk vörugjalda, sem var á allar almennar vörur sem voru fluttar til landsins" sagði Árni Þór. "Þetta þýddi gríðarlegan tekjumissi fyrir Reykjavíkurhöfn. Við endurvöktum þennan gjaldflokk eftir 1. júlí síðastliðinn og settum hann á þær vörur, sem hann hafði verið á áður. Þar með hækkar vörugjaldið á allar almennar vörur, sem undir þennan flokk féllu." Bergur Þorleifsson, hafnarstjóri Reykjavíkurhafnar, sagði að samgönguráðherra hefði flutt þær vörutegundir sem heyrt hefðu undir 4. gjaldflokkinn undir 3. gjaldflokk, sem hefði kveðið á um miklu lægra vörugjald. Tekjumissir hafnarinnar frá 1. júlí 2003 -- 1. júlí 2004 hefði numið 60 milljónum króna vegna þessara aðgerða, auk þess sem hún hefði verið rekin með halla allt frá árinu 2000. "Í kjölfar lagabreytingarinnar voru hafnargjöldin hækkuð," sagði Sturla Böðvarsson. "Við töldum að miðað við þær aðstæður væri eðlilegt að fella niður 4. gjaldskrárflokk vörugjaldanna. Það kemur því mjög á óvart að þeir skuli gera þessa gjaldskrárbreytingu. En hafnirnar hafa sjálfdæmi um ákvarðanir á gjaldtökum sínum, því ábyrgðin á rekstrinum er þeirra. Með breytingu á lögunum erum við að gera hafnirnar sjálfstæðari og ábyrgari, en drögum jafnframt úr ríkisframlögum til þeirra. En þessi ákvörðun hafnarstjórnar Reykjavíkur er ný tíðindi fyrir mig. Ég hélt að enginn vissi betur en þeir, að það var ekki tilgangurinn með því að gefa gjaldtökur frjálsar, að þeir gengju fram með ótæpilegum hætti með hækkunum. Ég vona svo sannarlega að þeir gæti hófs."