Jón Árni neitar að svara

Fyrrverandi skólastjóri Rafiðnaðarskólans neitar að svara spurningum um hvort hann hafi talið tugi milljóna króna frá Endurmenntun rafeindavirkja fram til skatts eða hvort launamiðar hafi verið gefnir út. Héraðsdómur sýknaði hann af ákæru um að hafa dregið sér tæplega 30 milljónir króna sem hann segir vera laun. Fyrrverandi skólastjóri Rafiðnaðarskólans, Jón Árni Rúnarsson, var í fyrradag sýknaður af ákæru um rúmlega 30 milljóna króna fjárdrátt úr Eftirmenntun Rafeindavirkja á árunum 1994 til 2001. Athygli vekur að Jón Árni var í maí í fyrra dæmdur til að endurgreiða þessa upphæð í einkamáli gegn honum. Guðmundur Gunnarsson, formaður Rafiðnaðarsambandsins, segir Jón Árna hafa haldið því fram sér til varnar að þessar milljónir hafi verið launagreiðslur sér til handa. Þó hafi engir launamiðar verið lagðir fram og ekkert af þessum peningum verið gefið upp til skatts. Fréttastofa hafði samband við Jón Árna til að bera þessar staðhæfingar Guðmundar undir hann. Jón Árni svaraði því til að hann hygðist ekki standa í fjölmiðlastríði við Guðmund. Þegar fréttamaður spurði Jón Árna hvort gefnir hefðu verið út launamiðar vegna þessar greiðslna og ef ekki af hverju, og enn fremur hvort Jón Árni hefði talið þessar tæpu 30 milljónir króna fram til skatts, og ef ekki, af hverju ekki, kaus Jón Árni að svara ekki spurningum fréttamanns. Hafi Jón Árni ekki talið þær fram til skatts er um skattsvik að ræða, sem vissulega er refsiverð framkoma.