Fæstar kærur enda með dómi

Af sjö til tíu kærum sem berast lögreglu á ári hverju vegna áfengisauglýsinga enda fæst mál með dómi. Fyrir þremur árum lagði vinnuhópur Ríkislögreglustjóra til endurskoðun laga, þar sem ekki væri hægt að beita þeim gegn áfengisauglýsingum. Lögin hafa ekkert breyst. Forstjóri ÁTVR, Höskuldur Jónsson, hefur sagt í fréttum Stöðvar 2 að áfengislög þyrftu að vera skýrari og tekur hann þannig undir með áfengisheildsölum. Í vínbúðum þessa dagana eru spjöld, útstillingar, bæklingar og fleira sem er í takt við blaðaauglýsingar ÁTVR. Verður ekki betur séð en að ríkið brjóti þar með tuttugstu grein áfengislaga, þar sem talað er um spjöld, útstillingar og fleira. Ingimundur Einarsson, varalögreglustjóri í Reykjavík, segir að á bilinu sjö til tíu kærur berist embættinu á ári, vegna áfengisauglýsinga. Hann segir fá mál fara alla leið í dómssal en þau sem það geri endi yfirleitt með sektum. Nýjasti dómurinn í svona máli er frá fimmta júlí síðastliðnum. Þá voru ákærðir ábyrgðarmaður og útgefandi rits sem gefið var út í tengslum við tónlistarhátíðina Iceland Airwaves fyrir tæpum tveimur árum. Í blaðinu var birt bjórauglýsing. Mennirnir tveir voru dæmdir til að greiða hundrað þúsund króna sekt hvor, ella sitja inni í tuttugu daga. Dómari vísaði til dóms frá 1999 þegar framkvæmdastjóri Ölgerðarinnar var dæmdur til sektargreiðslu fyrir að birta bjórauglýsingar á flettiskilti, í dagblaði og í útvarpi. Með tilliti til þessa dóms og annarra, þar sem menn voru meðal annars dæmdir fyrir að aka um á bílum merktum áfengistegundum, lagði vinnuhópur Ríkislögreglustjóra til, fyrir þremur árum, að tuttugasta grein áfengislaga yrði gerð skýrari. Einnig þyrfti að gera það refsivert fyrir eigenda blaðs eða ljósvakamiðils að birta áfengisauglýsingar. Áfengislög hafa verið óbreyt í sjö ár og Björn Bjarnason, dómsmálaráðherra, vísar í þessu sambandi í málflutning sinn á Alþingi þar sem hann ítrekar að lögregla og lýðheilsustöð framfylgji banni við áfengislögum.