Reykjavíkurhöfn hækkar vörugjöld

Reykjavíkurhöfn hækkaði vörugjöld á áfengi og ýmsar aðrar vörur um síðustu mánaðamót í því skyni að ná aftur tekjum sem ríkið hafði fellt niður. Ranglega var fullyrt í fréttum í gær að fjármálaráðuneytið bæri ábyrgð á verulegri hækkun vörugjalda sem er meðal annars til þess fallin að halda verði á áfengi háu í landinu. Ríkisvaldið ræður ekki öllu um gjaldskrá hafna lengur, en það er algengur misskilningur. Með nýjum lögum um hafnir, sem tóku gildi í fyrra, er samræmd gjaldskrá aflögð og hafnaryfirvöldum gert að ákvarða gjöld. Reykjavíkurhöfn ákvað sjálf að hækka vörugjöld á áfengi um 200 prósent úr 346 krónum í 983 á tonnið. Að sögn Bergs Þorleifssonar, hafnarstjóra í Reykjavík, hefur Reykjavíkurhöfn verið rekin með tapi frá árinu 2000. Við því hafi orðið að bregðast með hækkun vörugjalda, en þau séu um þriðjungur tekna hafnarinnar. Hækkunin nú hafi þau áhrif að gjöld, sem samgönguráðuneytið felldi niður, þegar gjaldskrárbreytingarnar voru á hendi þess, eru aftur lögð á; með öðrum orðum, Reykjavíkurhöfn tekur aftur það sem ríkið lækkaði í fyrra. Reykjavíkurhöfn reiknast til að gjaldtakan af hverri léttvínsflösku sé ein króna og þrjátíu aurar.