Þorskkvótinn búinn

Búið er að veiða upp þorskkvótann á þessu fiskveiðiári, eða 209 þúsund tonn, en heill mánuður er í nýtt fiskveiðiár og nýjan kvóta. Þetta er samkvæmt tölum Fiskistofu, en eitthvað er hægt að halda veiðum áfram með því að flytja kvóta á milli fiskveiðiára. Ufsakvótinn er líka að verða búinn og ýskukvótinn langt kominn, en hinsvegar eru tíu þúsund tonn óveidd af grálúðukvótanum, sem er hátt í helmingur kvótans. Er því útlit fyrir að ekki náist að veiða grálúðukvótann á þessu fiskveiðiári. Athygli vekur hversu illa frystitogurunum gengur að veiða hana, því stofninn hefur verið talinn í talsverðri uppsveiflu upp á síðkastið. Heildaraflinn núna er orðin ein milljón 665 þúsund tonn, sem er um það bil 66 þúsund tonnum minni afli en á sama tíma í fyrra. Stafar það fyrst og fremst af lélegri loðnuveiði, en góður kolmunnaafli hefur þó vegið það veiðitap upp að verulegu leiti.