Dýrara að flytja búslóð

Það er orðið dýrara en áður að flytja búslóð í gámum til og frá Íslandi, þ.e.a.s. fari menn að lögum. Samkvæmt nýjum lögum þarf sérstakur farmverndarfulltrúi að fylgjast með hleðslu gámanna. Skipafélögin telja þetta til ama fyrir viðskiptavini sína og gámum er enn hleypt úr landi án eftirlits, í andstöðu við gildandi lög. Eftirlitsaðilar vilja vita hvað fer um borð í skip og flugvélar og er hugtakið farmvernd meðal annars skilgreint sem forvarnir gegn hvers kyns ógn af hryðjuverkum. Sú breyting verður á búslóðaflutningum milli landa að farmverndarfulltrúi þarf að fylgjast með þegar gámur er hlaðinn. Sá fulltrúi er starfsmaður einkafyrirtækja, vottaður af Tollstjóranum í Reykjavík. Almenningur má merkja kassana og fylla út lista yfir það sem er í gámnum. Farmverndarfulltrúinn getur krafist þess að kassar séu opnaðir eða gegnumlýstir þar sem hann veit ekki hvað er í raun sett í þá. Eyþór Víðisson, örygisstjóri Samskipa, segir þetta mál sem margoft hafi verið tekið upp. Hann segir fyrirtækið ekki geta haft hugmynd um hvort maður úti í bæ pakki niður spengiefni eða símaskrám. Að þessu leyti sé málið mjög erfitt. Hann segir vandmeðfarið þegar fyrirtæki eins og Samskip skrifi upp á innihaldslýsingar í gámum sem það veit svo ekki nákvæmlega hvað er.    Sem dæmi bjóða Samskip og Eimskip upp á að hlaða og votta gáma. En þá þarf fólk að flytja búslóðina fyrst með sendibíl heiman frá sér í stað þess að fylla gáminn fyrir utan heimilið, sem er aukakostnaður frá því sem var. Það er reyndar líka raunin fái fólk farmverndarfulltrúann heim því hann tekur fimm þúsund krónur á tímann fyrir að fylgjast með hleðslu gámsins. Þótt lögin hafi tekið gildi 1. júlí má segja að aðlögunartímabil ríki þar sem gámar eru enn að fara í gegn án farmverndarinnsigla.