Hæsta verð nautgripakjöts á Hellu

Sláturhúsið á Hellu greiðir nú hæsta verð á alla flokka nautgripakjöts hérlendis og hefur jafnframt lækkað þungaviðmiðun úr 230 kílógrömmum í 200 kg. Í morgun var gerð breyting á gildandi verðlista hjá Sláturhúsinu þar að lútandi að því er segir í fréttatilkynningu á heimasíðu Landsambands kúabænda. Þetta gerir að verkum að bændur fá nú mun hærra verð fyrir léttari gripi en áður var unnt. Með þessum verðbreytingum hefur Sláturhúsið á Hellu bætt um betur frá þeim verðbreytingum sem SS gerði á sínum verðlistum sl. föstudag og til viðbótar fá bændur afurðir sínar greiddar fyrr hjá Sláturhúsinu en hjá flestum öðrum sláturleyfishöfum. Fastlega má gera ráð fyrir að samkeppni sláturleyfishafanna um viðskipti kúabænda harðni enn á komandi vikum og verðbreytingar verði gerðar hjá fleiri sláturleyfishöfum að því er segir í tilkynningunni.